Inatsit
tunngaviusoq
Ataani
ineqarnermut tapiiffigineqarsinnaanermut aammalu inatsimmut tunngaviusut
naatsumik nassuiarneqarput. Annertunerusumik paasisaqarnerorusuttut
Isumaginninnermut Inatsisinillu Atuutsitsinermut Naalakkersuisoqarfiup
nittartagaanut http://naalakkersuisut.gl – imut
innersuunneqarput, tassani isumaginninnermut inatsisinik atuuttunik
nalunaarutinillu il.il. atuartoqarlunilu aallertoqarsinnaavoq.
Ineqarnermut
tapiissutit
Ineqarnermut
tapiissutit inoqutigiinnut inissiani attartukkani attartortitsinermilu inatsit
atuutsinneqartoq malillugu pineqartuni najugalinnut tunniunneqartarput.
· Inoqutigiinni
inersimasut meeqqallu pineqartut tamarmik aalajangersimasumik inigisami
najugaqartuuppata.
· Inoqutigiit
ataatsimoorlutik isertitaat akileraarutaasussat aammalu meeqqat
aalajangersimasumik inigisami najugaqartut amerlassusaat tunngavigalugit
ineqarnermut tapeqartitsisoqartarpoq.
· Inigisami init
amerlassusaat najugaqartut amerlassusiannik ataatsimik amerlaneruppata ineqarnermut
tapeqartitsisoqarsinnaanngilaq.
Ineqarnermut akiliummut taamaallaat ineqarnermut tapiisoqarsinnaavoq. Atuinermut atuinermilu akitsuutinut ineqarnermut tapiissuteqartoqarsinnaanngilaq. Ineqarnermut tapiissut ineqarnermut akiliut, inoqutigiit ataatsimut isertitaat, ini inillu ilusilersugaanera kiisalu meeqqat 18-it inorlugit ukiullit angajoqqaaminni najugaqartut amerlassusaat malillugu kisinneqartarpoq. Soraarnerussutisialinni isertitami atuutsinneqartumi 4.100 kr-t peerneqartarput.
Inissiani attartortittakkani ineqarnermut tapiissutit pillugit Inatsisartut inatsisaat nr. 23 7. december 2015-imeersoq malillugu ineqarnermut tapiissuteqartoqartarpoq. Inatsit januaarip aallaqqaataani 2016-imi atuutsinneqalerpoq.